“Авыр бара, уңышы да күп”

Авыррак баруның объектив сәбәбе бер генә - тәуктаусыз яуган яңгырлар нәтиҗәсендә басуда эшләп булмый. Ә уңыш дөрестән дә начар түгел.
"Тукай" хуҗалыгының Күәм бригадасында эш аеруча кызу. Хуҗалыкта 17нче октябрьгә барысы 11 мең тонна кукуруз силосы тупланган булса, шуның 2 мең тоннадан артыгы Күәм өлеше.
- Чыгышы яхшы. Шулай да озакка сузмабыз, - ди "Ягуар" комбайнчысы Реваль Гатауллин.
- Мәйданы да зур, - ди "КамАЗ" шоферы Булат Төхфәтуллин.
Комбайннары - яңа, әле беренче елын гына эшли. Эш күрсәткече начар түгел. Ә комбайнчы күптән эшли. Монысы, кем әйтмешли, аерым тарих. Универсал комбайнчы, кыскасы, "три в одном": хуҗалыкның механигы да, авыл җирлеге башлыгы да ул.
Күәм фермасы ветеринар-санитары Йосыф Ганиев тә басуда.
- Ферма территориясендәге зур чокырны янәшә торган икене берләштереп эшләдек. Гаять күп сыйдырышлы. Терлекләргә туклыклы азык мул булыр. Әлегә кукурузның һәр гектарыннан уртача 210 центнер чамасы уңыш алабыз, - ди ул.
Эш ике сменалы итеп оештырылган. Машина, тракторлар туралган массаны төяп басудан чокырга алдагы төнлә - 24, көндез 32 рейс ясаганнар.
- Төнлә 10 рейс ясадым. Чокырга кадәр шактый ерак ара узарга туры килә. Асфальт юл аша әйләнеп узарга кирәк, - ди "КамАЗ" шоферы Фәнзил Хәкимҗанов.

Беренче багана - хуҗалыклар, икенче - тураткан мәйдан (процентларда), өченче - туплаган силос (тонналарда).
Ташчишмә 100 7325
Ленин 100 4106
Күшәр 80 4700
Таң 79 8550
Дусым 78 6725
Тукай 72 10976
Уңыш 67 2521
Күңгәр 67 1500
Мәңгәр 64 5599
Шахтер 62 8009
Район буенча 75 60011

Реклама

"Чәкәннәре бик тыгыз", - ди Реваль Гатауллин (уртада) Фәнзил Хәкимҗанов (сулда) белән Булат Төхфәтуллинга (уңда). Автор фотосы.