Әтнәдә язгы чәчү дәвам итә

Хәзер басу-кырларда зур чәчү комплексларын һәм аларга орлык, аммиак суы, ашлама алып килгән техниканы гына күрергә була. Чәчү комплекслары эшне зур мәйданнарда һәм тиз башкаралар. Авыл хуҗалыгы һәм азык-төлек идарәсе җитәкчесе Таһир Баязитовтан алган мәгълүматларга караганда, 13 майга язгы чәчү 29,8 процентка үтәлде инде.
Фәйзи Галиев һәм “Ленин” күмәк хуҗалыкларында бу сан 39 процентка якын. Аерым алсак, районда 27363 гектар мәйданда язгы чәчү үткәрәсе бар һәм шуның 8090 гектарында ул башкарылды инде.
Беренче багана – күмәк хуҗалыклар, икенче – чәчәсе мәйданнар (гектарларда), өченче – башкарган күләме (процентларда)
Фәйзи Галиев    1289    38,8
Ленин        3657    38,6
Күшәр        2960    35,1
Дусым    2217    30,1
Тукай        4132    30,0
Мәңгәр    2227    29,5
Таң        3786    28,3
Шахтер    3729    27,4
Уңыш        3366    14,4
Район буенча    27363    29,6
Аерым культураларга килсәк, “Күшәр”. “Мәңгәр”, “Уңыш” һәм “Дусым” борчак чәчүне төгәлләделәр. “Мәңгәр” арпаны да чәчеп бетерде. Ә “Уңыш” солы чәчүне төгәлләде. Сабан бодаен чәчү әлегә тиешле 3357 гектарның 599 гектарында башкарылды.
Шулай ук бөртеккә һәм силоска кукуруз чәчү, катнаш азык һәм берьеллыклар, күпьеллыклар, көнбагыш чәчү дә өлешчә башланды. Соя һәм вика үз чиратларын көтәләр.
Крестьян-фермер хуҗалык­ларына килсәк, КФХ Хәйруллин арпа чәчүне төгәлләде, көн­багыш чәчүне 42 % тирәсе башкарды. Ә гомумән алсак, язгы чәчүне 57,7 процентка үтәде.
Язгы чәчүне башкарып чыгуга ниндидер техник тоткарлык­лар юк. Бердәнбер борчыган мәсьәлә – һава торышының уңай көннәр бүләк итүе кирәк.

Яхшыга өметләник.