Әтнә үзәк китапханәсендә Ләйлә Дәүләтова белән «Кеше булып кал…» исемле кызыклы очрашу узды

Әтнә үзәк китапханәсендә бик тә үзенчәлекле, матур шигырьләр белән халык мәхәббәтен яулаган, ачык, ихлас, талантлы шагыйрә, күп популяр җырлар авторы, танылган алып баручы, Татарстан Республикасының атказанган сәнгать эшлеклесе Ләйлә Дәүләтова белән «Кеше булып кал…» исемле кызыклы очрашу кичәсе узды.
Язучы үзенең тормышы, иҗаты турында сөйләде, шигырьләрен укыды һәм катнашучыларның сорауларына бик теләп җавап бирде.
Очрашу чын мәгънәсендә җылы аралашу формасында барды. Кунакларыбыз Габдулла Тукай исемендәге Әтнә татар дәүләт драма театры артистлары, Әтнә туган якны өйрәнү музее җитәкчесе башкаруында Ләйлә ханымның шигырьләрен, Татарстанның атказанган артисты Алсу Хәбибуллина, яшь җырчыбыз Әдилә Хәмидуллина башкаруында авторның сүзләренә язылган җырларны тыңладылар.

Очрашу ахырында, Ләйлә Дәүләтованың иҗатын яратып, әлеге кичәгә килүчеләр шагыйрәнең култамгасы белән китаплар алдылар һәм аның белән бергәләп истәлеккә фотога да төштеләр.