Татарстанлыны ЮХИДИ бүлеге башлыгына 100 мең сум ришвәт бирергә омтылуда гаеплиләр

Бу турыда Россия Федерациясе Тикшерү комитетының Татарстан буенча идарәсе җитәкчесе өлкән ярдәмчесе Андрей Шептицкий хәбәр итә.

Тикшерүчеләр версиясе буенча, быел август аенда 61 яшьлек шоферны исерек хәлдә машина йөрткән өчен административ җаваплылыкка тарталар.

15 августта ул ЮХИДИ бүлекчәсе бинасына килә һәм җинаять җаваплылыгы турында күп тапкырлар кисәтүләренә карамастан, административ эш буенча җәлеп итмәсеннәр өчен бүлек башлыгының өстәленә 100 мең сум салынган кәгазь стакан куя.

Полиция хезмәткәре ир-атның гамәлләре турында кизү бүлегенә хәбәр итә. Ир-ат җинаять кылуга катнашы барлыгын таныган.

Хәзерге вакытта тикшерү бара.

Татар информ