Әтнә дәүләт драма театры артисты Сылу Бәйрәмованы котлыйбыз!

    Шагыйрьләр үткән гомерне аккан су, искән җил белән тиңлиләр. Ә хатын-кызның гомер юлында 55нче тукталышын ни белән тиңләргә, нинди бизмәннәргә салып үлчәргә соң?! Яшьнәр яшьлекнең кайтавазы әле тынарга өлгермәгән - ә инде тормыш дулкыннары салмаклана төшкән, хисләр бакчасын кыраулар алырга әле иртәрәк - ә шулай да уй-ниятләр аклыгы берәм-берәм чәчләргә ягыла башлаган, йөрәк һаман унсигездә кебек – бары гомер аргамагы гына 55нче чакрымына җиткән...

   Халыкта гомернең җәй уртасы дигән затлы бер сүз бар. Гомер үрләренә атлаган, яшьлек дәрте белән еллар тәҗрибәсе кушылган, хатын-кызның иң асыл, иң күркәм вакыты ул. Намус кушканча яшәлгән еллар, тормыш сукмагында, Әтнә театры тарихында уелып калган эзләрең, киләсе буынга мирас итеп тапшырырдай, сәхнә утларының балкышын үзенә сеңдергән якты хатирәләр... Үткәннәр матур, киләчәк исә тагын да гүзәлрәк: әле алда яшәешнең җете балкышы, эшләнәсе эшләрнең рәхәт тынгысызлыгы, ирешелгән уңышларның күркәм нәтиҗәсе, иҗатка багышланган мәгънәле озын гомер көтә.

   Сылу ханым! Ихлас күңелдән олы бәйрәмегез – 55 яшьлек юбилеегыз белән котлыйбыз! Киләчәктә дә яшәү дәртегез сүнмәсен, сау-сәламәт булыгыз, туганнарның җылысын, дусларның таянычын тоеп, балаларыгызның куанычын күреп, тигезлек белән озын-озак еллар иҗат итәргә һәм яшәргә Ходай насыйп итсен!

Ихлас хөрмәт белән, Г.Тукай исемендәге Әтнә татар дәүләт драма театры коллективы