Янгыннарның төп сәбәпләре

Янгыннарның төп сәбәпләренең берсе – ут белән саксыз эш итү. Ризык әзерләгәндә плитәне караучысыз калдырмаска кирәк. Ачык уттан файдаланмагыз һәм биналарда тәмәке тартмагыз. Еш кына янгыннар тәмәке кулланган вакытта сүндерелмәгән тәмәкедән килеп чыга һәм үлемгә дә китерә.

Төзек булмаган электр үткәргечләр, розеткалар, сүндергечләр һәм башка электр приборлары янгыннарга еш китерә. Иске чыбык бик еш кибә, ярыла башлый. Нәтиҗәдә, кыска ялганыш килеп чыга, бу янгынга китерә. Изоляция бозылган үткәргечне изолента белән тышларга кирәкми, аны яңасына алыштырырга кирәк. Әгәр йортта электр киеренкелеге булса, ут янып­сүнеп торса, электр энергиясенең каршы торучанлыгын тикшерергә кирәк. Электр розеткаларының начар, иске булуы шулай ук бик куркыныч.

Йортларда һәм мунчаларда янгыннар җылыту мичләрен һәм төтен юлларын дөрес урнаштырмаудан да килеп чыга. Металл, асбест һәм сэндвич торбалар куркыныч. Җылыту мичләрен һәм төтен юлларын урнаштырганда тиешле кагыйдәләрне үтәргә кирәк. Янгыннарны булдырмау өчен төтен чыга торган металл торбаларны кирпеч белән тышларга киңәш ителә. Сэндвич трубаларны урнаштыруның рөхсәт ителгән җылыну температурасын исәпкә алырга кирәк, чөнки төтеннең температурасы 500 °С дан артып китсә, сэндвич трубалар урнаштыру рөхсәт ителми, ә температура 300 °С дан артып китсә, асбестоцемент торбалары урнаштыру рөхсәт ителми.

Мунчада янгыннар җылыту мичләре артык кызудан килеп чыга. Кешеләр мунчаны тизрәк өлгертергә теләп, мичкә күп итеп утын тутырып ягалар, ә газ ягулыгын кулланганда мунча мичләре ягылуын оныталар. Мичләр һәм төтен юлларын урнаштыру буенча Арча һәм Әтнә муниципаль районнары буенча янгын күзәтчелеге һәм профилактик эшләр буенча районара бүлегендә киңәш алырга була. Янгын вакытында «01», «101», «112» номерларына шалтыратырга кирәк.

Рөстәм Сафин, Арча һәм Әтнә районнары буенча янгын күзәтчелеге бүлеге җитәкчесе