Әтнәләргә хөкүмәтнең зур ярдәме

Моның нигезе - Татарстан Республикасында күп балалы гаиләләрнең торак шартларын яхшырту буенча Министрлар Кабинетының "5 һәм күбрәк балалары булган гаиләләрне торак белән тәэмин итү буенча өстәмә чаралар турында"гы карарына барып тоташа.

Нәтиҗәдә, Каенсар авылыннан 7 бала тәрбияләүче Лидия һәм Госман Хафизовларга, Казак Үртәменнән 6 бала тәрбияләүче Резеда Галиевага менә шундый матур йортлар төзелеп килә. Төзелеп килә дию генә дөрес булмас, тиздән тулысынча әзер булачак бу йортлар. Һәрхәлдә Арча МСО төзүчеләре шулай дип ышандыралар.

Каенсардагы йортның тәрәзәләре куелган, эчке штукатур да ясалган.

- Матур йорт була, - диләр биредә уйнап йөрүче кечкенә Хафизовлар. Шунда ук өй эчендәге бүлмәләрне, кайда нәрсә урнашачагын да санап чыктылар. Барыннан да бигрәк, шәһәрдәге кебек уңайлыклар булуга сокланалар.

Урыны да бик уңайлы: авылның үзәгендә урнашкан. Каршыда - мәчет, клуб һәм кибет тә ерак түгел. Бөек Ватан сугышы батырларын искә алу обелискы да шунда гына. Өлкәннәр сүзенә караганда, элекке авыл бае нигезе бу. Әлегә кадәр анда буш урын - тыкырык иде. Хөкүмәтнең тагын бер ярдәме - өченче һәм аннан соңгы бала өчен җир кишәрлеген Хафизовларга нәкъ шушы җирдән бирделәр.

Хөкүмәтнең бу программалары гаять вакытлы булды. Минемчә, демография өлкәсенә уңай йогынты ясаучы төп факторлардыр болар. Уенын-чынын кушып: "Зур ярдәм бу, алдан белсәм мин дә 2 бала белән генә калмас идем", - диючеләрне еш ишетәм.