Бала тугач, гакыйка корбаны чалына

«Тиздән оныгым дөньяга килә. Бала тугач, корбан чалулары хакында ишеткәнем бар. Моның турында тәфсилләбрәк языгыз әле.

Шәүкәт Әюпов.

Самар шәһәре».

Бала туу - һәрвакытта да шатлык. Мондый куанычлы вакыйга булганда Рәсүлебез галәйһиссәлам, яңа туган бала исеменә шөкер кылу нияте белән, кыз бала туса - бер сарык, ир бала дөньяга килсә ике сарык чалган.

Әлеге корбан чалу «гакыйка» дип атала. Бу корбанның исеме «яңа туган баланың чәче» мәгънәсендәге гарәп сүзеннән килә.

Гакыйка корбаны чалу - мөстәхәб (хуплана торган) гамәл. Чалынасы хайванда башка төр корбанлыкларда булырга тиешле шартлар игътибарга алына. Гакыйка корбанын бала туганнан алып, балигъ булганчы чалу мөмкин, әмма иң фазыйләтлесе - җиденче көнендә чалу. Шул ук көнне балага исем бирү - мөстәхәб.

Гакыйка нәкъ гади корбан кебек чалына, бүленә һәм шуның бер өлеше мескен-фәкыйрьләргә бирелә, икенчесенә - балага атап аш мәҗлесе үткәрелә.

Пәйгамбәребез Мөхәммәднең (с.г.в.) хәдис-шәрифе бар, ул үзенең оныклары - кызы Фатыйманың балалары Хәсән белән Хөсәенгә берәр сарык чала һәм әйтә: «Ир-бала туса, мөмкинчелек булса, ике сарык чалыгыз, кыз-бала туса, бер сарык яки бер кәҗә чалыгыз», - ди. Ике сарык чалырга мөмкинлек булмаган очракта берне чалсаң да ярый.

Чыганак: http: samtatnews.ru