“Кайнатабыз, тозлыйбыз... – иң тәмлесен сайлыйбыз!”

Хөрмәтле газета укучыларыбыз!

Бүгенге көн шатлык-мәшәкатьләрен үзенә сыйдырган яңа бәйге игълан итәбез. Берегез дә игътибарсыз калмас дип уйлыйбыз. Бакчада җиләк-җимеш, яшелчә өлгерә торган чор. "Кайсын нишләтәсе?" дигән сорау кем башына гына килми икән. Интернет тулган рецепт, кайсын сайларга?- дип берәүләр эзләнгәндә икенчеләр үзләре генә белгән, сыналган, тәмле рецептлары буенча кайнаталар, тозлыйлар, маринад ясыйлар. Бер өлешен туңдыргычка тыгалар.

Менә шул сыналган, тәмлеләрне безнең белән дә уртаклашасыгыз килмиме? Килсә, рәхим итегез! Яңа бәйге сезнең өчен. Җиңүчеләрне бергәләп билгелибез! Һәм...- анысы әлегә сер! Хатларыгызны көтәбез, социаль челтәр, электрон почта - Сезнең өчен.

Редакциягә дә китерә аласыз, кемгә ничек уңайлы! Көтәбез.

Хөрмәтле редакция! Әлеге бәйге хакында укыгач, сезнең хозурга үзем яратып әзерли торган салатлар рецептын җибәреп карарга булдым. Бик тәмле була. Башкалар да эшләп карасын.
Гөлнур Сабирова, Олы Әтнә авылы

Әлеге "Лечо" рецептын миңа Биектауда яшәүче апам биргән иде.
Кирәк:
1,5 килограмм помидор, 0,5 килограмм болгар борычы һәм бер зур баш сарымсак.
Борычны саламлап турарга кирәк, помидорны иттарткычтан чыгарабыз.Сарымсакны да вак итеп турап салабыз. Әлеге массага 0,5 стакан песок, 0,5 стакан (ярты стакан) симәнке мае, 3 аш кашыгы уксус, 1 бал кашыгы лимон кислотасы, 1 аш кашыгы тоз салына.
Массаны 20 минут кайнатырга да стерильлаштырган банкаларга тутырып куярга. Бик тәмле була.

Аджика
Кирәк:
1әр килограмм помидор, кишер, болгар борычы алына. Аларны барысын бергә иттарткыч аша чыгарабыз.
2-3 данә кызыл ачы борыч салабыз. 0,5 стакан симәнке мае салып, 1 сәгать каплап пешерергә. Сүндерер алдыннан 0,5 стакан уксус, тәменчә тоз салырга. Суынгач 200 грамм сарымсакны вак угычтан уып салырга да, тагын 1 аш кашыгы тоз өстәргә.