Ринат –Сабан батыры

2017 елның Сабан батыры булып Ринат Рәшит улы Җиһангиров танылды.
Сабан батыры "Шахтер"да да, Кышкар, Кишет якларында да эшләгән. Тракторчы "Шахтер" җаваплылыгы чикләнгән җәмгыятенең "Нью-Холланд" тракторында 993 эталон-гектар язгы кыр эш­ләре башкарды: 1310 гек­тар җирдә чәчте һәм 465 гектарда культивация­ләде.
- Төрле чак була: авыры да, җиңеле дә. Тик шунысы бәхәссез - хезмәтеңне тиешенчә башкарырга, эшең­нең сыйфаты булырга тиеш, - дигән фикердә ул.
"Нью-Холланд" - зур трактор, бу хакта бер генә язмадык инде. Эшне дә күләмле итеп башкара, дөрес, чыгымы да шактый. Сабан батыры белән сүзне шул хакта сөйләшүдән башладык.
- Бәхәссез, солярны күп яга. Тракторның ягулык багы 1 тонна 200 литр сыйдырышлы, - ди Ринат.
Шулай да эшләүче кеше өчен гаять уңайлы, конструкторлар беренче чиратта тракторчыны күз ал­дында тотып ясаганнар бу тракторны, дип саный.
- Язгы кыр эшләре чорында бер айлап басудан кайтып кермәдем, - ди үзе.
Әңгәмә барышында шу­нысы да ачыкланды, бө­тен гомер юлы трактор бе­лән бәйле икән аның. 2000нче елдан бирле руль артында ул. Армия хезмәтеннән кайтуга тракторга утыра. Баштарак "Беларус"та "Кун-10" белән эшли. Монысы элекке "Сәрдә", "Уңыш" хуҗалыклары заманында була. Хәзер менә "Шахтер" хуҗалыгыныңсабан батыры.
Булганыннан, бүгенгесеннән канәгать ул. Тракторының яхшы гына эшләп торуына куана. Иң зур байлыклары - җәмәгате, клуб мөдире Ләйлә белән 2 кыз тәрбияләп үстерүләренә сөенә.
Ринат Җиһангировның максатчан йөзен, хезмәтенә мәхәббәтен, тракторы турында куанып сөйләвен күзаллаган хәлдә, монысы - соңгы җиңүе булмас дип уйлыйк. Сабан батырына ки­лә­чәктә дә уңышлар юлдаш булсын!