Капчык янында күсе күргәннәр

Бу очракта җаваплы түрәләрнең: “Аз гына уңайсызлык тууга, хәзер зарланыша башлый бу халык”, – диюен ишетәм. Тик бу уңайсызлык артык озын гомерле булып чыкты шул. Хәзер урамда очып-аунап йөргән чүп-чар өчен акча түләүне дә электрга бәйләп куйдылар. Ә капка төпләрендә чүп-чар өемнәре һаман үсә. Тиздән авылда туй булырга тиеш, дөресрәге, кәләш алып китәчәкләр. Кунакларның бу хәлне күреп исе китәр инде! Ярар, җыелган чүп өемен бер-ике тапкыр килеп булса да җыеп китәрләр дип өметләнергә була. Тик мәсьәләнең икенче ягы бар, монысы – бигрәк тә хәтәр. Капка төбендә өелгән чүп-чар өеменә карап, хозурланып утырган берәү капчыклар янында кәефе күтәренке һәм алпан-тилпән атлаучы зур күсе күреп шаккаткан.

Ныклап уйласаң, “Роспотребнадзор” дәрәҗәсендә хәл итәрлек мәсьәлә бит бу. Чөнки кимерүче булган җирдә чир таралу мөмкинлеге бик зур. Ә барысына да чүп-чарны җыярга тиеш була торып та төкереп карау гаепле. Йөри торгач, күзгә чалына бит ул: Түбән Көек, Иске Өҗем, Ташчишмә, Әйшияз авылларында да шул ук хәл икән. Ирексездән, кайчан ташып бетерерләр һәм гомумән ташып бетерә алырлармы икән бу кадәр чүп-чарны дигән сорау туа. Ә әлегә ике атнага бер тапкыр җыелырга тиешле чүп-чар «ароматы»на хушланып яшәргә мәҗбүр авыл халкы. Реваль Гатауллин, Күәм авыл җирлеге башлыгы: – Каенсар, Әйшияздан тыш, Дусым авылында да чүп-чар таулары хасил булды. Чүп җыючыларга көн саен дәшәм инде... Озакка сузмаслар, шушы көннәрдә үк җыештырырлар дип өметләнәм. Дамир Галиәхмәтов, Түбән Көек авыл җирлеге башлыгы: – Чүп җыю машинасы, ниһаять, бүген килде. (автордан: без барган 18 май көнне төшкә кадәр әле юк иде). Тик бөтенесен дә җыеп бетерә алмас инде алар. Безгә килгәнче Күңгәрдә булганнар. Анда да бер өлештә чүп-чар калган диделәр. Азат Вәлиев, Өҗем авыл җирлеге башлыгы: – Бер ай булды инде – чүпне һаман җыймыйлар. Шушы көннәрдә Мокшыдагыны алып киткәннәр үзе. Кичә телефоннан аңлатуларынча, Әтнә ягына аерым чүп җыю машинасын билгеләгәннәр. Көтеп карыйк...