Россия Пенсия фонды ана капиталын бала тугач та сарыф итү мөмкинлеген аңлатты

Кайбер очракларда ана капиталын бала тугач ук кулланырга мөмкин. Бу хакта Россия Пенсия фондының Мәскәү һәм Мәскәү өлкәсе бүлегендә искә төшерделәр.

Шулай итеп, акча торак шартларын яхшыртуга юнәлтелгән очракта балага өч яшь тулуын көтмәскә мөмкин. Сүз торак кредиты буенча беренчел кертем, булган займнарны каплау турында да бара. Бу турыда «Российская газета» хәбәр итә.

Моннан тыш, ата-аналар айлык акчалата түләүләр алу өчен ана капиталы акчасын да куллана ала. «Аңа икенче бала 2018 елның гыйнварыннан соң туган яки уллыкка алган аз керемле гаиләләрнең хокукы бар. Айлык түләүләрне балага өч яшь тулганчы алырга мөмкин», — дип ачыклык керттеләр Россия Пенсия фондында.

Акчаны бала тугач ук кулланырга хокук бирә торган тагын бер пункт — мәктәпкәчә белем бирү, шул исәптән балалар бакчасына чыгымнарны капларга мөмкин.

«Ана капиталы акчасы белән Россия Федерациясе территориясендә урнашкан һәм тиешле белем бирү хезмәтләрен күрсәтүгә лицензиясе булган очракта, мәктәпкәчә белем бирү учреждениесендә узган түгәрәкләргә, спорт секцияләре өчен түләргә мөмкин. Бу очракта акча мәгариф оешмасы хисабына күчерелә», — диделәр Пенсия фондында.

Шулай ук ана капиталы акчасын инвалид баланы социаль җайлаштыру өчен билгеле бер исемлектән товарлар сатып алуга чыгымнарны компенсацияләү буларак кулланырга мөмкин. Акчаларны инвалид туган балага да, уллыкка алынган балага да тотарга була.

Ана капиталы программасын 2006 елда Федераль Җыенга юллама барышында Владимир Путин тәкъдим итте. Түләү ел саен индексацияләнә. 2021 елда беренче балага ана капиталы 483 882 сум тәшкил итә, ә икенчесенә — 639 432 сум.

Чыганак: https://tatar-inform.tatar/news/society/29-09-2021/rossiya-pensiya-fondy-ana-kapitalyn-bala-tugach-ta-saryf-it-m-mkinlegen-a-latty-5839518