Татарстанда тагын 32 кеше коронавирус инфекциясе йоктырган

Татарстанда соңгы тәүлектә Covid-19 коронавирус инфекциясе йоктыруның 32 яңа очрагы ачыкланган.

Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) ТР буенча идарәсе җитәкчесе урынбасары Любовь Авдонина «Татар-информ» агентлыгында узган матбугат конференциясендә шулай дип белдерде.

«Узган тәүлектә Татарстан Республикасында коронавирус инфекциясе йоктыруның 32 яңа очрагы теркәлде. Шул рәвешле, республикада әлеге инфекцияне эләктергән пациентлар саны 21 392 кешегә җитте», - дип хәбәр итте ул.

Аның сүзләренчә, соңгы тәүлектә белгечләр яңа коронавирус инфекциясенә 7,9 мең тест үткәргән. Авырулар белән аралашкан 2,5 мең кеше табиблар күзәтүендә кала.

ТР сәламәтлек саклау министры урынбасары Владимир Жаворонков билгеләп үткәнчә, 18,3 меңнән артык кеше (шуларның 41е – узган тәүлектә) коронавирустан терелгән.

Чыганак: https://tatar-inform.tatar/news/health/28-05-2021/tatarstanda-tagyn-32-keshe-koronavirus-infektsiyase-yoktyrgan-5824909