Әтнә театры Дагыстанга китте

Әтнә театры Дагыстан республикасы башкаласы Махачкалада II Халыкара милли театрлар фестивалендә катнаша.

29 сентябрьдә театр Горький исемендәге Рус драма театры сәхнәсендә - "Ана күңеле... далада" ("Дуськина дача") (авторы - Альбина Гумәрова) трагикомедиясен тәкъдим итәчәк. Спектакльнең режиссеры - Рамил Фазлыев.

Фестивальдә Абхазия, Мордовия, Казахстан, Дагыстан, Ингушетия, Карачаево-Черкессия, Башкортостан, Төньяк Осетия-Алания кебек ил һәм республикалардан милли театрлар катнаша.

Исегездә булса, Әтнә театры әлеге фестивальдә 2019 елда "Югалган көн" спектакле белән катнашып, "Иң яхшы режиссура", "Иң яхшы ир-ат роле" (Таһир Габидуллин) номинацияләрендә лауреат булган иде.

Хәерле юллар сезгә, хәерле сәфәрләр насыйп булсын!