Көләрмен бер...

Син кышларда калдың, тик кайсында?
Шыгрым тулы хәтер китабы...
Кызыл каләм алып төзәтсәң дә,
ярты бите кала хаталы.

Ялгышмаган тәүбә итмәс, диләр.
Тукран түгел үзем, тик һаман
Мәхәббәткә тиңләп ялгышларны,
бәреләм дә ташка, баш ярам.

Сабак алыр вакыт узды юкса,
Акыл гына артка сукалый.
"Икеле"ләр куйган дәфтәр генә
Калыная никтер, юкармый.

Еллар узгач, оныкларым тугач,
Төнгә әкият итеп сөйләрмен.
"Шушы хәлләр сезгә гыйбрәт булсын,
ялгышмагыз, берүк",- диярмен.
Җүләр яшьлегемне искә алып,
Күз яшьләре аша көләрмен...

10.12.17
Фәридә Хәсәнова