Россиялеләрнең якынча 29 миллионы гриппка каршы прививка ясаткан

Быел якынча 60 миллион кешегә прививка ясау планлаштырыла.

(Казан, 2 октябрь, "Татар-информ"). Якынча 28,8 миллион россияле гриппка каршы прививка ясаткан, дип белдергән вице-премьер Ольга Голодец Дмитрий Медведевның урынбасарлары белән үткәргән киңәшмәсендә. Голодец белдергәнчә, быел барлыгы якынча 60 миллион кешегә прививка ясау планлаштырыла. "Бу безгә эпидемиянең җитди үсешен кисәтергә мөмкинлек бирә", - ди вице-премьер һәм вакцинациянең бушка үткәрелүен билгеләгән. Бу хакта "Интерфакс" яза.

"Без эш бирүчеләр, мәгариф оешмалары җитәкчеләре белән җитди мәгълүмати эш үткәрәбез", - ди Хөкүмәт рәисе урынбасары.

Ул билгеләп үткәнчә, узган елда дәүләт, һәр төбәк, һәр оешма дәрәҗәсендә башкарылган эш аркасында гриппка каршы күрелгән чаралар уңышлы булган.

Голодец министрларга гриппка каршы вакцинаны 5 октябрьдән ясый башлаячаклар, дип белдерә.

"Быел Хөкүмәттә прививкат ясату кампаниясе 5 октябрьдә башлана, мин барлык хезмәттәшләремне аны ясарга чакырам, һичшиксез, аны үземә дә ясатачакмын", - дигән вице-премьер.

Медведев, үз чиратында, Голодецтан кайсы министрларның вакцинация узуын хәбәр итәргә кушкан.

Чыганак: http://tatar-inform.tatar/news/2017/10/02/149449/