“Саташу” җаннарны уятты

Олы Мәңгәр халык театры авыл мәдәният йорты сәхнәсендә Туфан Миңнуллинның "Саташу" әсәрен сәхнәләштерде.
Премьера көнне мәдәният йорт сәх­нәсе шыгрым тулы иде. Зарыккан, сагынган Мәңгәр халкы үз артистларын. Чыгышларын да көч­ле алкышлар белән ка­бул иттеләр.
Спектакльне сәхнәгә авыл­дашыбыз, театрның режиссеры Рафис Сәләхетдинов куйды. Роль­ләрдә - Гөлсинә Ша­­кирова, Гөлсинә Саби­рова, Энҗе Гатауллина, Гөлзидә Камалова, Хә­тирә Рәхимова, Рәдис Хис­мәтуллин, Надир Саби­ров, Рәфыйкъ Сәләхетдинов.
Нигә нәкъ менә "Саташу"? Баштарак бу хакта каршылыклы фикерләр дә ишетергә туры килде. "Авыр әсәр сайлаганнар, автор фикерен ачып бирә алырлар микән?" дип шикләнүчеләр дә бул­мады түгел. Халык теат­ры артисты буларак бе­ренче тапкыр чыгыш ясау­чылар булуы ул шикне тагын да арттырды. Булдырырлармы, югалып кал­маслармы? Теа­т­­р­ның режиссеры Рафис Рәис улына да беренче соравым әнә шуның белән бәйле иде.
- Әлеге әсәрне сайлаганда иң беренче чиратта аның бүгенге көндә бик актуаль булуына игътибар иттем. Көн кадагына суга торган. Бүгенге көндә барыбызны борчыган тел мәсьәләләре, гаилә бәйләнешләре, намус, дин, әхлак. Мәхәббәт һәм хыя­нәт тә бар анда. Моннан тыш театраль фестиваль­ләрдә катна­шуны да күз уңында тот­тык. Төбәкара "Идел-йорт", "Өмет", "Театраль Буа" фестивальләре турында сүз. Катнашып, үзебезне сынап карарга исәп.
Гыйбрәт буларак уйландырырлык тормыш вакыйгаларын күтәрде бу көнне Мәңгәр халык театры артистлары. Килгән кунаклар арасыннан район хакимияте вәкиле Хәмит Галимҗанов фикере барлык тамашачыларның фикеренә тәңгәл дип уйлыйм.
- Монда кемнедер бик яхшы уйнады дип аерып әйтерлек түгел. Һәркем сәхнәдә үз амплуасында иде. Театрны район тамашачысына да күрсә­тү кирәк.
Дөрестән дә, халык театры әлеге спектакль белән тиздән авыл мәдәният йортларында чыгыш ясаячак. Күрше Арча, Балтач, Саба районнарында куярга да уйлыйлар. Кече сәхнәләр өчен юмористик театраль шоу да әзерләгәннәр.
Спектакль өчен декорацияләр "Мәңгәр" кү­мәк хуҗалыгы ярдәме белән эшләнгән. "Тамашачыларга, һәрчак яр­дәмгә әзер булган хуҗалык җитәкчесе Айдар Габделбәр улына, килгән кунакларга спектакльгә биргән бәяләре өчен бик рәхмәтле без. Афишаларны карап барыгыз, килегез, күрегез. Ә без үз чиратыбызда сезнең ышанычны акларбыз дип уйлыйм", - ди Рафис Сәләхетдинов.