Суд карарын көтәләр

Эчке эшләр бүлеге тарафыннан район буенча "Мәк" операциясе игълан ителүе турында хәбәр иткән идек. Әлеге операция барышында Бәрәскә авылында бер ир-атның үз бакчасында наркотик маддәләргә ия булган үсемлек үстерүе ачыкланган. Сиксән ике төп мәк юкка чыгарылган, ә хуҗага карата җинаять эше ачылган. Бүгенге көндә әлеге эш буенча тикшерү үткәрелеп, судка тапшырылган.
Руль артына спиртлы эчемлек кулланып утырган өчен мәхрүм ителгән хәлдә кабат исерек килеш утыр­ган күрше республика кешесенә карата да җинаять эше ачылып, тикшерелгән. Бу эш тә шулай ук судка җибәрелгән. "Һәр ике эш буенча суд карары шушы көннәрдә чыгарылачак", - ди өлкән дознаватель Айсылу Нигъмәтҗанова.