Укучылар хәрәкәте киң колач җәя
Россия укучылар хәрәкәте моннан ике элек Россия Федерациясе президенты Указы нигезендә, Яшьләр эше буенча Федераль агентлык каршында оештырылган иде. Аның төп максаты - үсеп килүче буынны тәрбияләү өлкәсендә дәүләт сәясәтен камилләштерү. 29 октябрь илебез буенча әлеге хәрәкәтнең туган көне буларак билгеләп үтелә. Шунысы кызыклы, Татарстан укучылары әлеге хәрәкәткә беренчеләрдән булып...
Россия укучылар хәрәкәте моннан ике элек Россия Федерациясе президенты Указы нигезендә, Яшьләр эше буенча Федераль агентлык каршында оештырылган иде.
Аның төп максаты - үсеп килүче буынны тәрбияләү өлкәсендә дәүләт сәясәтен камилләштерү. 29 октябрь илебез буенча әлеге хәрәкәтнең туган көне буларак билгеләп үтелә. Шунысы кызыклы, Татарстан укучылары әлеге хәрәкәткә беренчеләрдән булып кушылдылар.
Бәйрәм уңаеннан, Олы Әтнә урта мәктәбендә активистлар съезды булып узды. Бирегә биш мәктәптән - Комыргуҗа, Күәм, Күңгәр, Бәрәскә һәм Олы Әтнә урта мәктәпләреннән бишенче сыйныф укучылары килгән иде. Биредә алар тантаналы рәвештә Россия Укучылар Хәрәкәте сафларына бастылар.Шунда ук тантаналы ант та бирделәр. Анда "Мин, Россия Федерациясе гражданины, "Россия укучылар хәрәкәте" Бөтенроссия оешмасына кергәндә, гадел һәм җаваплы булырга, өлкәннәрне хөрмәт итәргә, дуслыкка ышанырга, туган илне яратырга, аңа тугры хезмәт итәргә ант итәм!" - дигән сүзләр бар иде. Соңгы сүзләр Актлар залын тутырып, хор белән яңгырады. Укучыларның һәрберсенә хәрәкәтнең символикасы төшерелгән махсус значоклар тагылды.
Бу минутларда ирексездән, пионерга, комсомолга кергән үсмер чаклар искә төшеп китте. Отрядларның саф-саф булып басуы, тантаналы шартларда байракны кертү, отряд председательләренең хәрәкәт активисты Алмаз Хөснетдиновка рапорт бирүе, исем, девизлар - бар да җиренә җиткереп башкарылды.
Тантана барышында Олы Әтнә укучыларыннан бер төркем Юнармеецлар сафына кабул ителде. Мәктәпнең "Орлята" командасы укытучылары Нәкыйп Мәгъсүмов җитәкчелегендә Казанда узган "Юнармеецлар, алга" хәрби спорт уеннарында катнашып, өченче урын алуы турында язган идек. Съезд уңаеннан байрак кертү дә нәкъ менә шул юнармиячеләрнең иң- иңнәренә тапшырылды. Яшь хәрбиләр сафына кабул ителүчеләр - укуда һәм җәмәгать эшендә актив катнашучылар, үрнәк тәртип күрсәтүчеләр. Аларны бүгенге тантана уңаеннан котлап, җитәкчеләре Нәкыйп Мәгъсүмов моннан соң да тырыш булуларын, юнармияче исеменә тап төшермәүләрен теләде. "Бу сафларга укучылар арасыннан иң-иңнәрне генә сайлап алабыз. Бүген менә 12 укучы юнармияче булды. Бу исемне йөртүегез белән горурлана аласыз. Ә калганнарга киләчәктә шушы исемгә лаек булу өчен тырышырга кирәк", - диде ул. Бүгенге бәйрәмнәре белән котлап чыгыш ясаган район мәгариф бүлеге җитәкчесе Ленар Гарипов һәм мәктәптән тыш эшләр үзәге җитәкчесе Эльмира Мәгъсүмова да укучыларның һәркайсына изге-җылы теләкләрен җиткерде.
Россия укучылар хәрәкәтенең туган көне - 29 октябрь, комсомол туган көн белән бер көндә булуы да юкка түгел, минемчә. Заманында комсомол исеме астында ничәмә-ничә буын патриотик тәрбия алды, илне яратырга, Ватанга тугры булырга өйрәнде. Яңа оешкан хәрәкәт тә нәкъ менә шул максатларны күз алдында тота. Соңрак хәрәкәтнең матбугат үзәге вәкилләре "Мастер-класс"та катнаштылар.
Следите за самым важным и интересным в Telegram-каналеТатмедиа
Нет комментариев