Бәрәскә “Факел”ының мөмкинлеге зур

Бәрәскә урта мәктәбе базасында «Факел» хәрби-патриотик клубы 2023 елның 17 ноябрендә оеша.  
Бу хакта Бәрәскә урта мәктәбенең тәрбия эшләре буенча директор киңәшчесе  Диләрә Хәкимуллина белән сөйләштек.
– Бу клубның максаты – шәхес буларак Россия гражданинының патриотик, физик, интеллектуаль һәм рухи үсешенә ярдәм итү; аның лидерлык сыйфатларын үстерү, – дип ассызыклады Диләрә Хәкимуллина.
Бурычлары киңрәк икән, әлбәттә. Беренче чиратта, әхлакый һәм патриотик тәрбия өлкәсендә дәүләт яшьләр сәясәтен гамәлгә ашыру бурычы тора. Моннан тыш яшьләрдә Ватанга хезмәт итүнең иң яхшы традицияләрендә туган илгә мәхәббәт тәрбияләү; Россия гаскәрләренең данлы традицияләрен саклау һәм арттыру; Ватанны саклаучылар истәлеген мәңгеләштерү; яшьләрне хәрби хезмәткә әзерләүдә ярдәм итү; спортның техник һәм хәрби-гамәли төрләрен үстерү һәм яшьләрдә актив тормыш позициясе формалаштыру да бурычларның аерылгысыз өлешләрен тәшкил итәләр.
Клубның җитәкчесе итеп мәктәпнең физкультура укытучысы Нәкыйп  Мәгъсүмов билгеләнә.
Бу уңайдан хәрби-патриотик клубны физкультура укытучысы җитәкләү отышлы да әле. Аеруча аның Нәкыйп Мәгъсүмов булуы куанычлы факт. Спорт­ны бик ярата торган, хәрби-патриотик тәрбияне үз эшчәнлегендә өлге итеп алучы, заманында волейбол буенча Россия чемпионнары тәрбияләгән укытучы турында аерым бер мәкалә язарлык.
Әлеге клуб кысаларында тәр­бияләнүчеләр, инструкторлар, укытучылар саны, мәктәбенә күрә әллә ни күп түгел, әлбәттә. Әмма эш күләмдә түгел, сыйфатта. Сыйфатка килсәк, бу очракта “Факел” клубына йөрүчеләрнең төрле хәрби-патриотик чараларда катнашуларын телгә алу урынлы булыр. Беренче чиратта, әфганчылар белән узган очрашулар, хәрби-патриотик юнәлештәге спорт уеннары һәм төрле патриотик рухтагы конкурслар, әлбәттә. Җитәкчесе әйтүенчә, әле менә “Аҗаган”га әзерләнеп яталар.
Биредә моның өчен яхшы җирлек – укыту-матди базасының күпләр көнләшерлек булуын әйтергә кирәк. Монда тормыш иминлеге нигезләре буенча белем алу мөмкинлеге зур. Шулай ук мәктәпнең бик яхшы футбол мәйданчыгы, спорт инвентарьләре, ике экземпляр “АК” автоматы макеты бар.
Кыскасы, Бәрәскә урта мәктәбенең «Факел» хәрби-патриотик клубы укучыларны җәмгыятькә хезмәт итүгә әзерләүдә һәм тәрбияләүдә бик мөһим роль уйный. Клубның укыту методикасы спорт дәресләреннән алып хәрби әзерлек һәм патриотик тәрбия нигезләренә кадәр төрле аспектларны үз эченә ала. Бу комплекслы якын килү балаларга физик сәләтләрен һәм күнекмәләрен үстерергә генә түгел, ә үз иле өчен патриотик горурлык һәм аңа хезмәт итәргә әзерлек формалаштырырга да мөмкинлек бирә. 
Хәрби-патриотик клуб кысаларындагы спорт дәресләре укучыларга сәламәтлекләрен ныгытырга, чыдамлык һәм көчләрен үстерергә, шулай ук бердәм команда булып эшләргә өйрәнергә ярдәм итә. Мондый күнекмәләр хәрби хезмәтне уңышлы үтү өчен генә түгел, ә тормышның теләсә-кайсы өлкәсендә уңышка ирешү өчен дә кирәк. Спорт белән шөгыльләнү нәтиҗәсендә балалар хезмәт һәм тырышлыкның кадерен белергә, шулай ук үзләрен тәртипкә өйрәтәләр. Бүгенге көн күзлегеннән караганда, соңгысы аеруча мөһим.
Хәрби-патриотик клуб программасына кертелгән хәрби әзерлек нигезләре укучыларга үз-үзләрен саклау, урында ориентлашу, корал белән эшләү һәм башка мөһим күнекмәләргә ия булырга да ярдәм итә. Бу белемнәр экстремаль хәлләр туа  калса кирәк булырга мөмкин һәм укучыларда үз иминлеге һәм әйләнә-тирәдәгеләрнең иминлеге өчен җаваплылык хисе формалаштыруга ярдәм итә.
Янә “Факел”ны телгә алсак, анда катнашучыларның төп өлеше – мәктәпнең IX, X, XI сыйныф укучылары. Әлбәттә, клубка кечерәк сыйныфлар да җәлеп ителә.
Хәрби-патриотик клуб кысаларында үткәрелә торган патриотик тәрбия укучыларның гражданлык позициясен формалаштыруда төп роль уйный. Балалар үз илләренең тарихын, мәдәниятен һәм гореф-гадәтләрен хөрмәт итәргә һәм бәяләргә өйрәнәләр. Алар Ватанны саклауның мөһимлеген аңлыйлар һәм кирәк булганда аның мәнфәгатьләрен якларга әзер. Патриотик тәрбия укучыларга актив гражданнар булырга, җәмгыятькә хезмәт итәргә һәм үз илен сакларга әзер булырга ярдәм итә.