Бер-беребезне хөрмәт итик

Районның юл иминлеге инспекторларыннан алган мәгълүматларга игътибар итсәк, кагыйдә бозу очрак­лары һич кенә дә кимеми.
Юл иминлеге хез­мәт­кәр­ләре өчен юл хәрәкәте имин­леген тәэмин итү, һә­ла­кәтләрне кисәтү һәм юлларда хокук бозуларны булдырмау – төп бурычларның берсе булып тора. Һәрбер юл хәрәкәте кагыйдәсен бозу очрагы җитди нәтиҗәләргә китерергә мөмкин, шуңа күрә инспекторлар тарафыннан һәрбер хокук бозуга тиешле чаралар күрелә.
Исерек хәлдә руль артына утыру – иң куркыныч хокук бозуларның берсе.

Исерек хәлдә машина йөртүчеләр үз­ләренең генә түгел, баш­ка юл хәрәкәтендә кат­на­шу­­чыларның да гомерен куркы­ныч астына куялар. Шу­шы аралыкта инспекторлар тарафыннан бер машина йөртүче исерек булуда шикләнелеп туктатыла. Тиешле булмаган урында икенче транспортны узарга тырышу да җитди һәлакәтләргә китерергә мөмкин. Бер машина йөртүче әлеге кагыйдәне бозган өчен җавапка тартыла. Ә менә газиз балаларыбызны махсус утыргычка утыртмый йөртүне җинаять дияргә дә буладыр. Бу юлы 2 машина йөртүчегә штраф түләргә туры килгән. Куркынычсызлык каешларын эләктермичә йөрү – иң күп кагыйдә бозу очракларының берсе.

Бер атна эчендә 9 машина йөртүче җавапка тартылган.
Юл иминлеге хез­мәт­кәр­ләре җәяүлеләрнең дә юл хәрә­кәте кагыйдәләрен үтә­венә зур игътибар бирә. Җә­яү­­леләрнең юлны рөхсәт ителмәгән урыннан чыгуы фаҗигагә китерергә мөм­кин. Кызганычка каршы, хә­зер тиз караңгы төшә. Юл­ларда күрүчәнлек бик начар. Киемнәрдә яктырткыч элемент­лар булмаса, кырыйда барган кеше күренмәскә дә мөмкин.
Шулай ук узган атнада район юлларында 2 юл һәлакәте тер­кәлгән. Юлларда һәрвакыт игътибарлы булыйк. Юл хәрәкәте кагыйдәләрен төгәл үтәргә һәм башкаларның гомеренә хөрмәт белән карарга өйрәник.