Күп балалы гаиләләргә җир урынына акчалата түләү бирү тәртибе билгеләнде

ТР Министрлар Кабинеты өч һәм аннан да күбрәк баласы булган гаиләләргә бушлай җир кишәрлеге урынына акчалата түләү бирү тәртибен билгеләде. Бу хакта «Татар-информ» яза.

Карар нигезендә, түләү күләме 200 мең сум тәшкил итәчәк.

Аны Казанда яки Чаллыда даими яшәүче һәм шәхси торак төзү, шәхси ярдәмче хуҗалык алып бару яки бакчачылык өчен җир кишәрлеге алуга рәсми исемлекләргә кертелгән өч һәм аннан да күбрәк балалы гаиләләр ала алачак.

Акчаны алу өчен ата-аналарның яисә вәкаләтле вәкилләрнең берсенә җирле үзидарәнең вәкаләтле органына гариза бирергә кирәк. Документта гаиләнең барлык әгъзаларының да участокны акчага алмаштыруга ризалыгы расланган булырга тиеш.