Мин һаман да синнән бизмәдем - "Әтнә таңы"

Әтнә шагыйрәсенең чираттагы иҗат җимеше.

Җан ярамның әрнеп сызлаганын,
Үтеп киттең, нигә сизмәдең?
Эзләреңне кочып елар булдым -
Мин һаман да синнән бизмәдем.

Сагышларым инде чиктән ашты...
Яңгыр явып, юллар өзелгән...
Күзләр талды - белмим, ни эзлим соң,
Торналарның киткән эзеннән?

Күкнең төбе тишелгәндер, ахры -
Көзләр аңлый минем хәлемне.
Мәхәббәттән соңгы ядкарь итеп
Түргә элдем ачы әремне.

Сары яфрак минем җаным төсле -
Үрелдем дә, жәлләп өзмәдем.
Эзләреңә ятып мең үкседем...
Ярый әле үзең сизмәдең...