Россия Кубогы өчен көрәштеләр

Шушы көннәрдә малайлар, кызлар һәм яшүсмерләр арасында узган шахмат буенча Россия кубогы өчен бәйге - Рәшит Нәҗметдинов Мемориалы тәмамланды.
"Нәтиҗәләр начар түгел. Республика данын яклаган яшь шахматчыларыбыз яхшы чыгыш ясадылар", - диде тренер Раил Шакиров.
Тренер шәкертләрен һәр бәйгедә катнаштырырга тырыша. Бу юлы да Казанда узган Россия Кубогы этабында Татарстанның авыл районнары вәкилләре күп булмады, ә безнекеләр катнашты. Шул ук вакытта турнирга Россия Федерациясенең Кырымнан Владивостокка кадәр булган 30 субъектыннан килгәннәр иде.
9 яшькә кадәрге малайлар һәм кызлар бәйгесендә Самат Шәрәфиев белән Азалия Мифтахова уңышлы чыгыш ясадылар. Икесе дә I урын иясеннән 3әр баллга гына калыштылар. Кызлар арасыннан безнең Азалиядән алда Пермь крае, Чиләбе белән Свердловск өлкәләре һәм 7 Татарстан шахматчысы гына урнашты. Самат та көтелгәннән югарырак урынны яулады.
11 яшькә кадәрге шахматчы малайлар саны 78 үк булды. Бу төркемдә Татарстан данын Әтнәнең берьюлы 3 шахматчысы - Алмаз Бадиков, Камил Кәримов, Ислам Мөхәмәдҗанов яклады. "Мондый зур турнирда алардан артык күпне өмет итмәгән идем. Шулай да яхшы уеннар белән сөендерделәр", - диде остаз.
11 яшькәчә шахматчы кызлар төркемендә Исламия Мөхәмәдҗанова да сокланырлык чыгыш ясады. Тренер аның 3 балл туплый алуын "Әйбәт күрсәткеч", дип бәяләде.
Кыскасы, безнең яшьләр яхшы шахматчылар булуларын тагын бер кат расладылар. Алда - авыл районнары арасында Татарстан беренчелеге көтә. Шахматчыларыбыз бу турнир алдыннан Россия күләмендә чыгыш ясап, яхшы чыныгу алдылар.