Бертуганнар өйдән чыгып качкан...

Уралда абыйлы-энеле ике бала өйләреннән качкан, чөнки алар мәктәпкә барырга теләмәгән. Бу хакта “Комсомольская правда” хәбәр итә.
Бу хәл 1 сентябрьгә каршы төндә булган. Свердловск өлкәсе Артин районы полициясенең дежур частенә улларының югалуы турында әни кеше мөрәҗәгать иткән. Аның сүзләренә караганда, 8 һәм 11 яшьлек малайлар кич белән өйдән ерак түгел йөргән. Әниләре аларны өйгә чакыргач, кермәгәннәр һәм качып киткәннәр, шул килеш өйләренә әйләнеп кайтмаганнар.
Балаларны төн буе эзлиләр, эзләүдә эчке эшләр бүлегенең 65тән артык хезмәткәре катнаша. Иртән генә гаражлар яныннан табалар. Малайлар мәктәпкә барырга теләмәгән өчен өйдән качып китүләре турында сөйли. Алар җентекләп әзерләнгән — үзләре белән бутерброд, су алган, күпмедер вакыт гаражлар артында утырырга булганнар. Караңгы төшкәч, әниләреннән куркып, өйләренә кайтмаганнар.
Полиция хезмәткәрләре сүзләренә караганда, бертуганнарының берсе инде берничә тапкыр өйдән чыгып киткән. Хәзерге вакытта балалар тернәкләндерү курсын узу өчен сәламәтлек саклау учреждениесенә җибәрелгән.
Моннан тыш, малайларның әнисен ата-ана вазыйфаларын үтәмәгән өчен административ җаваплылыкка тарттыру мәсьәләсе дә хәл ителә.
Фото: activityedu.ru