Ахирәткә илтмә, кирәкми

Бөек Раббым кеше затын җирдә
Ашыгучан итеп яраткан.
Гамәлләрне һәм дә тереклекне
Капма-каршы, парлы яраткан.
Мин ашыктым, сабыр итмәдем шул,
Авыр сүзләр әйттем, түзмәдем.
Рәнҗеттем дә сине, менә бүген
Үз өстемә гөнаһ йөкләдем.
Кичерә алсаң син, кичер мине!
Җанны телә әйткән сүзләрем.
Тәүбә иттем һәм дә өмет итәм,
Кичерерсең, бәлки, безләрне?
Бәндә белән бәндә арасында
Булган хакны Раббым төзәтми.
Синең хакны киметкәнмен, беләм,
Ахирәткә илтмә, кирәкми.