Татарстанда хаталы татар телле элмә такталарны табучылар арасында бәйге игълан ителде
Ун җиңүчегә диплом һәм кыйммәтле бүләкләр биреләчәк.
Кеше хокуклары буенча вәкаләтле вәкил — «Халык контроле» дәүләт мәгълүмат системасы Татарстанда татар телендәге хаталы элмә такталары яки татар теленә тәрҗемә ителмәгән язуларны табучылар өчен конкурс уздыра. Бәйгенең протоколы кайбер районнарның порталларында урнаштырылды.
Бәйге 2021 елның 1 февраленнән 1 сентябренә кадәр үткәрелә. Конкурсның модераторлары — «Халык контроле» һәм Галимҗан Ибраһимов исемендәге Тел, әдәбият һәм сәнгать институты. Бу хәбәрне Кеше хокуклары вәкиллегенең матбугат үзәге хезмәткәре раслады. «Җиңүчеләргә биреләчәк кыйммәтле бүләкләр әлегә билгеле түгел», — диде ул «Татар-информ» хәбәрчесенә.
Катнашу өчен ТР Дәүләт һәм муниципаль хезмәтләр порталында теркәлергә яки «Халык контроле» мобиль кушымтасыннан файдаланырга кирәк. Хәбәрне калдыру өчен «Исем һәм язулардагы хаталар» категориясен сайлау, фотоматериалны йөкләү, адресны күрсәтү, вакыйга исемен, тулырак мәгълүмат, басма кагыйдәләре белән ризалыкны раслау һәм персональ мәгълүматларны эшкәртүгә ризалык бирү сорала.
Конкурс татар телен саклау һәм таныту, халыкның игътибарын элмә һәм мәгълүмати такта, топографик тамга, юл күрсәткечләре һәм торак йортларның игълан такталарындагы хаталарга җәлеп итү максатында уздырыла.
«Халык контроле» һәм модераторлар нәтиҗә чыгарып, ун җиңүчене сайлап алачак. Аларга диплом һәм кыйммәтле бүләкләр тапшырылачак.
Следите за самым важным и интересным в Telegram-каналеТатмедиа
Нет комментариев