Балалар саталар, әти-әниләр сатып ала

Быелгы «Көзге ярминкә»не мәктәп коллективы зур масштабта үткәрергә булганнар.

Ярминкәдә һәркем үзенең осталыгын күрсәтергә тырышты. Берәүләр тәмле пироглар пешергән, икенчеләр – төрле салатлар ясаган, өченчеләр исә – үз бакчаларында үскән җиләк-җимешләрен алып килгән. Ярминкәдә хәтта кулдан эшләнгән сувенирлар да бар иде. Укучылар агачтан уенчыклар ясаган, әни һәм әбиләре бәйләгән чәпәләй, оекбашлар да алып килгәннәр.

Бәйрәмнең иң күңелле өлеше – уеннар һәм конкурслар булды. «Көзге ярминкә» вакытында музыка яңгырап торды, җырлар җырланды. Һәркемнең күңеле күтәренке иде.

Ярминкәдән җыелган акчаны мәктәп коллективы махсус хәрби операциядә катнашкан ир-егетләребезгә бирергә уйлаганнар.

- Безнең бу гамәлне әти-әниләр дә, балалалр да хуплады, – диде мәктәп директоры Гөлия Мөхәммәтшина.

Олы Әтнә урта мәктәбе укучылары һәм укытучылары, әти-әниләр бердәм булып, яхшы эш башкардылар.

Көзге ярминкә – ул бергә булу, аралашу һәм күңел ачу өчен менә дигән мөмкинлек. Ул һәркемгә яхшы кәеф бүләк итте һәм күңелләрдә җылы хатирәләр калдырды. Киләчәктә дә әлеге матур традиция дәвам итәр дип ышанабыз.