Кем самокатта, кем велосипедта

Бу чорда балаларыбызны хәвеф-хәтәрләрдән сакларга тырышып, гел кисәтеп торсак та, бәлагә кая юлыгасын белеп булмый шул. Бу очракта да шундый ук хәл килеп чыга.

Моңа кадәр юлларда имгәнүчеләр, һәлак булучылар – машина, мотоцикл йөртүчеләр булса, хәзер күңелсез исемлекне самокатта йөрүчеләр тулыландыра. Соңгы вакытта район юлларында да самокатта йөрүчеләрне, бигрәк тә балаларны очратырга була.

“Туган ягым” паркында самокат белән бәйле күңелсез хәл килеп чыкты. Бер бала үзенең көчен чамалап, тизлекне саклап бетермичә бетон юлга егыла. Кызганычка каршы, аягын имгәндереп район үзәк больницасына мөрәҗәгать итәргә туры килә. Аңа вакытында медицина ярдәме күрсәтелә һәм Казанга республика балалар клиникасына җибәрелә. Бүгенге көндә аның сәламәтлегенә куркыныч янамый”, – дип хәбәр итә Эчке эшләр бүлегенең өлкән дознавателе Айсылу Нигъмәтҗанова. Соңгы елларда самокатта йөреп имгәнүчеләр саны арта. Шуңа күрә дә юлларда игътибарлы булсак иде. Самокатларда җилдергәндә бигрәк тә.