Бәйрәм белән сезне гүзәл затларыбыз!

Язның беренче бәйрәме уңаеннан кояш кебек ягымлы, игелекле, аяз көн кебек якты күңелле, чәчәктәй гүзәл затларыбызга күңел түреннән чыккан ихлас котлау сүзләрен һәм иң изге теләкләремне җиткерәм.
Элек-электән хатын-кыз җан җылысын, матурлык һәм назлылыкны үзендә гәүдәләндерә, дөньяга яңа тормыш, киләчәккә өмет-ышаныч бүләк итә. Гаилә учагын тергезүче һәм саклаучы да, җәмгыятебезнең терәк-таянычы да ул. Ә илнең көче — яхшы гаиләдә. Бүген тормышыбызда хатын-кызның роле гаять зур. Хатын-кызларыбыз районның икътисади, сәяси һәм иҗтимагый тормышы үсешенә бәяләп бетергесез өлеш кертәләр. Игенчелектә дә, терлекчелектә дә һәр күрсәткечебез куанычлы — республикада әйдәп барабыз, мәгариф һәм мәдәният өлкәсендәге уңышларыбыз санап бетергесез, яшьләр тормышында һәм спортта гүзәл затларыбыз яулаган үрләр бихисап. Хөрмәтле гүзәл затларыбыз күпкырлы хезмәтләре белән җәмгыятебезнең рухи-әхлакый нигезләрен тотрыклы итүгә, ныгытуга, район, республика, ил казанышларына зур өлеш кертә. Гаиләдә бала тәрбияләүдә, шул ук вакытта җитештерү тармагында фидакарь хезмәт үрнәкләре күрсәтеп, хатын-кызларыбыз соклану тудыра, тирән ихтирам уята.
Хөрмәтле гүзәл затлар! Сезне матур бәйрәмегез белән чын күңелдән тәбриклим. Ныклы сәламәтлек, бәхет, якыннарыгызның хөрмәтен һәм сөюен, иминлек, бөтен изге эшләрегездә яңадан-яңа уңышлар телим!
Габделәхәт Хәкимов, Әтнә районы башлыгы