Исерек ир-ат өенә кайту өчен автобус урлап киткән

Чаллыда исерек ир-ат өенә кайту өчен автобус урлап киткән, дип хәбәр иттеләр Россия Эчке эшләр министрлыгының Чаллы идарәсендә.

Әлеге хәл төнге сәгать өчтә булган. Кунактан кайтып барганда исерек ир-ат Виктор Поляков урамында торган «НЕФАЗ» автобусын күреп ала. Ул ишекне ачып керә, ачкычын табып кабыза да, автобуста 27нче комплекска — үз өенә юл ала. Үз урам юлына кергәндә ул чит ил машинасына төртелеп китә.

Бу хакта ЮХИДИ патруль-пост хезмәте экипажына билгеле булган. Полиция хезмәткәрләре закон бозучыны тоткарлаган.

Чаллы кешесенә карата урлау максатыннан башка гына транспорт чарасын алып идарә итү турында җинаять эше кузгатылган. Тоткарланучы үз гаебен таный. 

Чыганак: https://tatar-inform.tatar/news/incident/19-05-2021/iserek-ir-at-en-kaytu-chen-avtobus-urlap-kitk-n-5823847