Бу мәктәп өчен ике зур юбилей — гасырдан артык белем бирү тарихы һәм яңа бинада ярты гасыр дәвамында укучыларга белем һәм тәрбия бирү чоры. Чарада мәктәп коллективы, ветеран-укытучылар, чыгарылыш укучылары һәм хәзерге укучылар чакырылган иде.
Бәйрәм мәктәпнең тарихын чагылдырган күргәзмә белән башланды. Анда иске фотосурәтләр, ветеран-укытучыларның истәлек дәфтәрләре, төрле еллардагы чыгарылыш классларының альбомнары куелган иде.
Кунаклар аларны озак карап торды, күпләр үзләренең уку елларын искә төшерде.
Тантаналы өлештә мәктәп директоры чыгыш ясады. Ул мәктәпнең 115 еллык тарихында буыннар алмашынуын, ә яңа бинада соңгы 50 елда меңнәрчә укучының белем алуын билгеләп үтте. Ветеран-укытучылар сәхнәгә күтәрелеп, үз истәлекләре белән уртаклашты. Алар мәктәпнең беренче елларын, иске бинадагы дәресләрне, укучыларның тырышлыгын искә алды.
Бу юбилей мәктәп өчен генә түгел, бөтен авыл өчен дә мөһим вакыйга булды. Ул буыннар бәйләнешен ныгытты һәм мәктәпнең киләчәктә дә белем учагы булып калуына ышаныч тудырды.
Нет комментариев