Розаларны кайгыртып

Көзгә розаларны азотлы ашламалар белән тукландырудан туктыйлар. Алар яшел массаның үсүенә ярдәм итә, ә кышлау алдыннан ул кирәкми. Әмма бу башка тукландыруны да туктатырга кирәк дигәнне аңлатмый. Үсемлекләргә, тамыр системасы ныгысын өчен, фосфор һәм калий кирәк.

Төрле төрдәге ашламаларны кулланырга мөмкин: 

• гранулалы – гадәттә аларны грунт өслегенә сибәләр һәм алар акрынлап эреп, туфракка үтеп керә;
• сыек (үсемлекнең тамырдан өске өлеше) – суда эретелә, ябалдаш ясалу өчен кирәк;
• сыек (үсемлекнең тамыр өлеше) – су белән кушыла һәм туфракка кертелә.

Өстәвенә, мондый ысул белән файдалы элементларны үсемлекләр бик тиз үзләштерә.

Розаларны кышка кисү: бу эш, гадәттә, октябрьнең икенче яртысында башкарыла, әмма һава торышына карарга кирәк. Иң мөһиме, җылы булмасын, юкса, розалар яңа бөреләр формалаштыра башлый, ә кышка кергәндә моның кирәге юк.

Кышка әзерлек: куак тирәсен чүп үләннәреннән чистартырга һәм йомшартырга кирәк. Үсемлекне фунгицидлар белән эшкәртергә, аннары төбенә җир өергә (опилка яки ком да ярый).

Яшел Үзән