Баланың сәламәтлеге тәлинкәдән башлана

Гаилә ничек симерүне җиңә

Балаларда артык авырлык проблемасы үсә бара. Фастфудны маркетологлар алга сөргәндә, сәламәтлек сагында торучы төп калкан — әти-әниләрнең авторитеты һәм грамоталы контроль.

Әтнә үзәк район хастаханәсе табибларыннан төп кагыйдәләр  

Балаларга тәмне сабый чакта салыгыз.

Аш-су гадәтләре өч яшькә кадәр формалаша. Файдалы ризыкка мәхәббәт уятыгыз һәм брокколины беренче тапкыр ашамаганнан соң бирешмәгез — балага яңа ризыкны кабул итү өчен 10–15 омтылыш кирәк булырга мөмкин.

«Өстәргә / алып куярга» балансын саклагыз. 

Өстибез: яшелчәләр, җиләк-җимешләр, кузаклылар, бөртекле ризыклар (гречка, көрән дөге) һәм чикләвекләр. 

Киметәбез: терлек майларын һәм яшерен шикәрләрне. Бала тәлинкәсенең яртысы яшелчәләрдән торырга тиеш.

Өйдәге ризыкларга игътибар бирегез:

Газлы суларны, сокларны, кайнатманы, кондитер эшләнмәләрен, фастфудны, чипсыларны һәм ярымфабрикатларны менюдан сызыгыз. Суыткычта алар булмаса — проблема да юк.

Гаилә кичке ашларын кире кайтарыгыз 

Гаджетларсыз уртак табын теләсә нинди диетадан яхшырак эшли:

• Балалар өлкәннәр үрнәген күрәләр һәм күбрәк яшелчә-җимеш ашыйлар.

• Сөйләшә-сөйләшә акрынрак ашыйлар һәм тизрәк туену хисен сизәләр.

• Яшүсмерләр гаилә өстәле артында ашаса – начар компанияләргә сирәгрәк эләгә һәм психологик проблемалары азрак була.

Көн саен кимендә бер сәгать хәрәкәтләнегез

Уртача аэроб активлык (тиз атлау, йөзү, велосипед). Баланы һәркайда хәрәкәткә җәлеп итегез: автобус урынына бер тукталышны җәяү үтәргә, мәктәптә актив тәнәфесләр ясарга, йоклар алдыннан гаилә белән саф һавада йөрергә.
Туклануга һәм хәрәкәткә игътибар бирү — балаларыгызның киләчәгенә иң яхшы адым.

Сәламәт буын сәламәт гаилә традицияләреннән башлана.

Бу мәгълүмат «Озын һәм актив тормыш» милли проекты кысаларында әзерләнде.