Шарыпово шәһәренең дәүләт драма театры Әтнәдә

Габдулла Тукай исемендәге Әтнә татар дәүләт драма театрында «Зур гастрольләр» дип исемләнгән Федераль программа кысаларында  Красноярск крае Шарыпово шәһәре драма театры гастрольләре узды.

Узган ел әлеге программа кысаларында Дагыстан республикасының Дербент шәһәрендә урнашкан Табасаран театры гастрольләре булган иде. Табасаран дәүләт драма театры коллективының гастрольләре булып, әлеге коллективның да спектакльләрен кызыксынып караган идек. Хәтта бер спектакль табасаран телендә иде. Тәрҗемә белән карадык.

Республикабызга танылган театр артитлары бүләк иткән Әтнә егете буларак, районыбызның театр тормышы белән даими кызыксынып барам. Башкача мөмкин дә түгел, һәр әтнәленең канында театр сәнгатенә карата мәхәббәт каны ага. Кечкенәдән театр сәнгате белән «җенләнеп», сәхнәләрдә уйнап үскән кеше мин. Шуңа да һәрдаим Әтнә театры репертуары, яңалыклар белән танышып барам, мөмкинлек чыгу белән спектакльләрен карап барырга тырышам. 

Федераль программа нигезендә эшлиләр

Быел Әтнәгә Красноярск крае артистлар кайтты. Мин фәкыйрегезгә, шул коллективның берничә спектаклен карау насыйп булды.     

Спектаклҗләр турында нидер язганчы, иң элек Шарыпово шәһәренең кайдалыгы белән интернет аша таныштым.  Ишеткән шәһәр түгел. Җитмәсә ара ераклыгы да хәйран икән.

Шарыпово Красноярск краенда Кадат елгасы ярында, Шарыпово шәһәренең үзәгеннән 235 километр ераклыкта урнашкан кечкенә шәһәр. Торак пунктның мәйданы 30 квадрат километр тәшкил итә. Безнең Әтнә районы тагын да кечкенә.

 Дәүләт театры Шарыпово шәһәрендәге «Фаэтон» халык театры базасында 1982 елда Улан-Удэ шәһәренең театр академиясен тәмамлаган яшь режиссер Наталья Желтова һәм КАТЭК бөтенсоюз комсомол төзелешенең талантлы төзүчеләре тарафыннан оештырылган 

24 апрель көнне коллектив Әтнә тамашачысына Алексей Толстой әкиятләре буенча Анна Богачева сәхнәләштергән «Буратино» спектаклен тәкъдим итте. Спектакль рус телендә барды. Классик сюжет өлкәннәр аудиториясенә күбрәк юнәлдерелгән булса да, балалар спектальне бик яратып, чын күңелдән карадылар. Ә без, «өлкән балалар өчен бу әкият уйланырлык спектакль булды. 

Красноярск крае Шарыпово шәһәренең драма театры коллективы Әтнә тамашачыларына өч спектакль тәкъдим иттеләр. Спектакльләр рус телендә барды. 

Әтнәне яратып китәбез...

Тамашачы өч көнне дә спектакль карарга килде, зал тулылыгы төрле көнне төрлечә иде. Соңыннан кунаклар үзләренең тәэсирләре белән уртаклаштылар.

Театрның директоры Наталья Тайченачева:

- Иң мөһиме җылылык. Без килгән көннәрдә һава торышы да безнең өчен миһербанлы булды. Шулай ук әтнәләр безне җылы каршы алдылар. Коллектив та бик ошады. Гомумән, барысы да югары дәрәҗәдә оештырылган иде. Без бирегә килгәндә, безнең якларда кар иде әле. Сезнең якның җылы кояш нурлары безне шатландырды, - диде.

Артист Анастасия Еремеева:

-  Татарстанда мин икенче тапкырын киләм. Беренче тапкыр Чаллы шәһәрендә узган фестивальдә катнашкан идек. Әтнә безгә бик ошады. Биредә шундый матур, биналарыгыз сокландырды. Менә дигән дәүләт театрыгыз бар. Якында гына спорт үзәге, бассейн – барысы да искитәрлек. Сезнең авылдан бик нык тәэсирләр алдык. Әтнә тамашачысына килгәндә, безнең коллективны җылы кабул иттеләр. Спектакльләребезне аңлап, тиешле урында кул чабып карадылар. Кызганыч, азрак булдылар. Әмма Әтнәдән зур тәэсирләр белән китәбез, - диде.

Кунак ашы кара каршы, диләр. Җәйге айларда Әтнә татар дәүләт драма театры коллективы гастрольләр белән Красноярск крае Шарыпово шәһәренә барачак.