Сөмбел химия фәненнән Бердәм дәүләт имтиханын 100 баллга бирде

Узган елда Күңгәр урта мәктәбе укучысы Ралинә Гарипова химия фәненнән 100 балл җыеп зур уңышка ирешкән иде. Быел бу традицияне дәвам итеп, химия фәне укытучысы Хәмдия Галиеваның янә бер укучысы – Сөмбел Хисамиева химия фәненнән Бердәм Дәүләт имтиханын 100 баллга тапшырды.

Сөмбелнең юлы

Сөмбел Күшәр төп мәктәбендә 9 сыйныфны тәмамлаганнан соң, 10-11 сыйныфларны укырга Күңгәр урта мәктәбенә килә. Киләчәктә табиб булу хыялы аны шул мәктәпкә алып килә. Сөмбелнең максаты ачык: кешеләргә ярдәм итәргә һәм аларның сәламәтлеген кайгыртырга.

Укытучы һәм укучы

Сөмбелнең уңышы – мәктәп өчен дә зур горурлык. Химия укытучысыХәмдия ханым Галиеваның да тәҗрибәсе бик зур. Химия фәненә, табиб һөнәренә мәхәббәт тәрбияләгән укытучының бүгенге көндә бик күп укучылары сайлаган һөнәрләренә тугры хезмәт итәләр. 

- Укытучым белән дә, төрле курслар сатып алып та, химия фәнен ныклап өйрәндем, – ди Сөмбел үзе.

Әти-әнинең ярдәме

Сөмбелнең әти-әнисе кызларының уңышына бик шат. Алар һәрвакыт Сөмбелне хуплап, аңа кирәкле шартлар тудырырга тырышканнар. Әти-әнисенең ярдәме һәм Сөмбелнең тырышлыгы бергә кушылып, менә шундый зур нәтиҗәгә китергән.

Киләчәк

Сөмбелнең киләчәктә медицина университетына укырга кереп, үз хыялын тормышка ашырырга теләге зур. Без аның максатчанлыгы һәм тырышлыгы аңа бу юлда уңышлар китерер дип ышанабыз. Сөмбел кебек сәләтле яшьләр – безнең республикабызның киләчәге.

Сөмбелнең уңышы башкаларга да үрнәк булып тора, һәм без аңа уңышлар телибез!

Фотода Сөмбел укытучысы Хәмдия Галиева белән.