Әтнәдә тагын ике исерек!

Район автоинспекция­се инспекторы Ренат Мөхтәзировтан алган мәгъ­лүматларга караганда, 12-20 май көннәрендә юлларда исерек хәлдә транспорт руле артына утыруда шикләнелеп 2 йөртүче тоткарланган. 
Сәер инде, ел ярымга “пра­ва”сыз калу, шулай ук гаилә бюджетын 45000 сумга киметү ниндидер рәхәтлек бирәме икәнни андый затларга? Әллә алкогольдән башка яши алмас­ка әйләнгәнме алар? Үзегезне генә түгел, сез бит, гомумән, юл хәрәкәтендә катнашучыларны куркыныч астына куясыз. Ә бит гап-гади кагыйдә: эчкәнсез икән, рульгә якын да килмәгез. Хәзер бу 2 затның исереклеген судта дәлиллиләр.
Шушы ук чорда куркынычсызлык каешын такмаган 11 йөртүче ачыкланган. Тонировкасы тиешледән артык булган һәм ими­ният белешмәсе булмаган берәр йөртүче җаваплылыкка тартылган. Шул узган бер атнада транспорт юлын тиеш булмаган җирдә аркылы узган 2 җәяүле дә тоткарланган.
Мондый күңелсезлекләргә эләкмәс өчен юл иминлеге инспекторлары сезне юл кагыйдәләрен үтәп  йөрергә чакыра.