Секундлар хәл итә

Алда барган машинаны узу максаты белән каршы як полосадагы транспорт каршына чыгу иң куркыныч маневрларның берсе ул. Ни кызганыч, әлеге юл хәрәкәте кагыйдәсен бозу, күп очракта, кеше гомерен дә өзә.
Соңгы 5 айда район юлларында ЮХИДИ инспекторлары тарафыннан каршы як полосага чыгу буенча 18 протокол төзелгән. Кызганычка каршы, 1 юл һәлакәте дә теркәлгән. Әлеге юл һәлакәтендә бер кеше тән җәрәхәте алган.
— Каршы як полосага чыккан өчен 5 мең сум күләмендә штраф яки 4 айдан 6 айга кадәр йөртү хокукыннан мәхрүм итү каралган. Бу беренче тапкырында гына. Ел дәвамында икенче тапкыр эләксә, 1 елга машина йөртү хокукыннан мәхрүм ителә, — ди ЮХИДИ бүлекчәсе җитәкчесе Айнур Ямалиев.
Сүзен дәвам итеп: — Ашыгып, узышып йөрмәгез. Бер секунд кеше гомерен өзәргә мөмкин, — дип кисәтә.
Алда бәйрәм, юлда транспорт хәрәкәте дә күп булачак. Шуңа күрә дә, игътибарлы булыйк, юлларда ашыкмыйк.